Ermənilərə vergi güzəşti, biznes imkanı, hətta polisdə iş təklifi...

Politoloq: “Kimsəyə xüsusi imtiyaz tanınmır və tanınmayacaq”

Azərbaycan Respublikası Qarabağ bölgəsində yaşayan erməni sakinlərin reinteqrasiyası ilə bağlı əməli fəaliyyətə başlayıb. Bununla əlaqədar, Qarabağın erməni sakinləri ilə təmaslar üzrə müəyyən edilmiş məsul şəxs Ramin Məmmədov 2023-cü il sentyabrın 21-də, 25-də və 29-da Yevlax və Xocalı şəhərlərində erməni sakinlərin nümayəndələri ilə görüşüb.

“Trend” xəbər verir ki, görüşlərdə Azərbaycan Respublikasının reinteqrasiyaya dair planları təqdim edilib və onun ətrafında müzakirələr aparılıb.

Qeyd edilib ki, reinteqrasiya Azərbaycan Respublikasının ərazi bütövlüyü və suverenliyi çərçivəsində Azərbaycan Respublikasının Konstitusiyası, qanunları və beynəlxalq öhdəlikləri əsasında həyata keçirilir.

Etnik, dini və ya dil mənsubiyyətindən asılı olmayaraq, hər kəsin hüquq və azadlıqlarının bərabərliyinə, o cümlədən hər kəsin təhlükəsizliyinə təminat verilir.

Hüquqi və idarəetmə sahəsi:

Erməni sakinlərin yaşadıqları ərazilərdə idarəetmə Azərbaycan Respublikası Prezidentinin xüsusi nümayəndəlikləri vasitəsilə həyata keçirilir. Sakinlər xüsusi nümayəndəliklərin işinə cəlb oluna bilər.

Azərbaycan Respublikasının qanunvericiliyinə uyğun olaraq, seçkilər vasitəsilə bələdiyyələr formalaşdırılır.

Sakinlərin vətəndaşlıq məsələləri Azərbaycan Respublikasının Konstitusiyasına və qanunvericiliyinə uyğun olaraq, müvafiq prosedurlar əsasında həyata keçirilir.

Təhlükəsizlik sahəsi:

Tərk-silah və tərxis prosesi başa çatdırılır, bütün silahlar sakinlərdən yığılır.

Azərbaycan Respublikasının daxili işlər orqanları ərazidə ictimai asayişin qorunmasını və sakinlərin təhlükəsizliyini təmin edir. Sakinlər daxili işlər orqanlarına işə cəlb oluna bilər.

İqtisadi sahə:

Sakinlərin yaşadıqları ərazilərin fiziki və sosial infrastruktur təminatı (təhsil, səhiyyə, enerji, qaz, su, yol, rabitə, meliorasiya və s.) müəyyən müddət ərzində ölkə üzrə orta göstəricilər səviyyəsinə çatdırılır.

Qarabağ və Şərqi Zəngəzur iqtisadi rayonlarında iqtisadi inkişafın sürətləndirilməsi məqsədilə tətbiq edilən xüsusi iqtisadi rejim ilə bağlı təşviq paketi, o cümlədən vergi və gömrük güzəştləri sakinlərin yaşadıqları ərazilərə şamil olunur.

Azərbaycan Respublikasının milli valyutasının tam tədavülə keçməsi təmin edilir.

Sakinlərin yaşadıqları ərazilərdə sahibkarlıq fəaliyyəti üçün dəstək tədbirləri həyata keçirilir. Ölkədə sahibkarlıq subyektlərinin maliyyəyə çıxış imkanlarının artırılması ilə bağlı tətbiq olunan güzəştli kreditlər, faizlərin subsidiyalaşdırılması, kreditlərə zəmanətin verilməsi və digər maliyyə alətləri sakinlərin yaşadıqları ərazilərə şamil olunur.

Fermerlərə subsidiyalar verilir və onlar torpaq vergisi istisna olmaqla, bütün vergilərdən azad edilir.

Mülkiyyət məsələləri Azərbaycan Respublikasının qanunlarına uyğun olaraq tənzimlənir.

Sosial sahə:

Sakinlər ölkə üzrə əməyin ödənişi və sosial ödənişlər sistemi ilə əhatə olunur.

Sakinlərə Qarabağ və Şərqi Zəngəzur iqtisadi rayonlarında sosial sahədə tətbiq olunan güzəştlər, sosial xidmətlər və məşğulluq proqramları şamil edilir.

Sakinlər səyyar xidmətlərdən (Səyyar ASAN və Səyyar DOST) faydalanırlar.

Mədəniyyət, təhsil və din sahəsi:

Sakinlərin öz mədəniyyətini, etnik-mədəni xüsusiyyətlərini qorumaq və inkişaf etdirmək hüququ təmin edilir.

Dini etiqad azadlığı, mədəni və dini abidələrin mühafizəsi təmin olunur.

Erməni dilinin istifadəsinə imkan yaradılır.

Reinteqrasiyanın praktiki icrası ilə bağlı erməni sakinlərin nümayəndələri ilə təmaslar davam etdiriləcək.

Xəyal Bəşirov

Siyasi və Hüquqi Araşdırmalar Mərkəzinin sədri Xəyal Bəşirov “Yeni Müsavat”a şərhində bildirdi ki, 21,25 və 29 sentyabr tarixlərində Qarabağdakı erməni sakinlərin nümayəndələri ilə keçirilən görüşlərdən sonra onlarla müzakirə edilən və razılaşdırılan məsələlər ictimaiyyətin diqqətinə çatdırılıb: "Oktyabrın 2-də isə Prezident Administrasiyasının rəsmi məlumatı oldu. Hüquqi və idarəetmə sahəsində, iqtisadi, sosial və mədəni sahələrdə mühüm məqamlara toxunan məsələlər diqqətə çatdırıldı. Əsas məsələ odur ki, Azərbaycan öz qanuni mövqeyindən geri çəkilmir və qarşıya qoyduğu plan əsasında prosesi aparır. Azərbaycanın əsas qətiyyətli mövqeyi o idi ki, bu məsələ bizim daxili məsələmizdir. Hazırda da daxili məsələmiz olaraq addımlarımızı atırıq. Qarabağda Azərbaycan vətəndaşı olaraq yaşayacaq ermənilərə verilən hüquqlara gəlincə, digər vətəndaşlarımıza konstitusiyamızın verdiyi hüquqlar onlara da veriləcək. Ermənilərə digər vətəndaşlarımızdan fərqli heç bir hüquq, imtiyaz verilmir və verilməyəcək. Reinterqasiya üçün açıqlanan tədbirlər planından da bu aydın görünür. Ermənilər ilk öncə Azərbaycan cəmiyyətinə adaptasiya olmalıdırlar. Onlar reinteqrasiya prosesində üzərlərinə düşən vəzifələrə ciddi yanşamalıdırlar. Yəni onlara vətəndaş kimi hüquqlar verilirsə, vətəndaş kimi üzərlərində vəzifələr də yaranır. Onlar üzərlərinə düşən vəzifələrə əməl etməldirilər. Vəzifələrinə hansı şəkildə yanaşmaları kimi məsələlər də nəzərə alınacaq. Erməni sakinlərə tanınan hüquqlar digər vətəndaşlarımıza tanınan hüquqlarla eyni olacaq. Vətəndaş kimi öz vəzifələrindən kənara çıxan, qanunları pozan hərəkətlərə yol verənlər isə qanunlar qarşısında cavabdehlik daşıyacaqlar. Azərbaycan polisi və digər müvafiq qurumlar bölgədə təhlükəsizliyi, asayişi təmin edəcəklər. Necə ki, digər ərazilərimizdə bunu edirlər. Hər bir vətəndaş milliyyətindən asılı olmayaraq bu qaydaları nəzərə almalıdırlar. Erməni vətəndaşlar könüllülük prinsipi ilə müxtəlif dövlət orqanlarında, eləcə də polisdə işləyə biləcəklər. Burada da qanunlara riayət etmələri şərti ilə. Yəni kimsəyə xüsusi imtiyaz tanınmır və tanınmayacaq”.